Ndërmarrjet anti-covid19

"Udha e shkronjave" u vendos në qendër të vëmendjes së publikut për shkak të reagimit të shpejtë ndaj pandemisë globale.  Janë një seri artikujsh dhe intervistash që do t'i gjeni edhe në këtë faqe dhe një seri reagimesh pozitive nga publiku. 

Kjo na shtyn edhe më shumë pozitivisht të  bëjmë atë që dimë të bëjmë shkollimin cilësor. 

Shoqëria dhe biznesi tashmë janë në fazën rënies për më poshtë dhe shumë biznese po mbyllen dhe shumë njerëz po humbin punën.  

Nuk ka rrugë tjetër veç ristrukturimit dhe ristrukturimi kërkon aftësi në fusha të ndryshme.  Ndërkohë që kushtet kanë ndryshuar struktura e një ndërmarrjeje në tiparet kryesore nuk ka ndryshuar, por detyrat e ndërmarrjes dhe përshtatja e saj sigurisht që janë të reja dhe shumë vetë nuk do të munden t'i zgjidhin në kohë.

 Ne dalim për herë të parë me konceptin "Ndërmarrje Anti-Covid19" që do të thotë një ndërmarrje që vepron në kushtet e reja  të distancimit social, kriter i cili do të ndryshojë kaq shumë funksionimin e ndërmarrjes dhe suksesin e saj.  

Shembulli i shkollës sonë ose i problematikës së një shkolle në përgjithësi është mjaft domethënës për ristrukturimin sepse  shkollat llogariten si veprimtari tepër sensitive dhe do të jetë një problem i madh për të gjithë shtetin dhe shoqërinë ristrukturimi i tyre, por fatmirësisht "Udha e shkronjave" edhe në këtë drejtim është shumë para. Ju ftojmë të lexoni artikullin "Të parët për masat anti Covid19 edhe për vitin 2020-2021". Në artikull shpjegohet qartë se si kriteri i distancimit social ndikon fuqishëm veprimtarinë e shkollës dhe plani ynë për vitin 2020-2021 është shumë i përputhur me këtë kriter. 

Koncepti "Ndërmarrje antiCovid19" është i justifikuar plotësisht. Është e qartë se për oponencë me termin, nuk mundet të themi "ndërmarrje antigrip", sepse është shumë i qartë, evident, dallimi i gripit nga "pandemia". Në kushtet kur lajmërimet janë që kjo periudhë e pasigurisë do të zgjasë shumë.  "Ndërrmarje anti-Covid19", në një kuptim tjetër, mund të quhet edhe një ndërmarrje e re që ka lindur në vend të së vjetrës (së dështuar) pikërisht për shkak të krizës që shkaktoi Covid19 dhe  që nuk ka lidhje me respektimin e distancimit social ose kushtet e vështira të reja. Thjesht një ndërmarrje ra dhe po ngrihet tjetra në një treg të ri, në kushte të reja të krijuara nga "covid19" dhe për këtë arsye kuptimi "anti-covid19" mund të duket i figurshëm por edhe kuptimi i figurshëm ka kuptim kur me "covid19" kuptohet "infeksioni që mori biznesi i vjetër" pra jo infeksioni i vërtetë "nga njeriu tek njeriu". 

Fjala "ndërmarrje" mundet të trembë shumë të rinj që duan t'i futen biznesit, sepse përfytyrojnë menjëherë atë ndërmarrjen e madhe, por ndërmarrja fillimisht është e vogël dhe për këtë arsye vlen shumë nxitja e nismave për të hapur biznese. Të hapurit e bizneseve kërkon kohë. Mund të jetë më e lehtë të futesh në punë diku dhe të fillosh të marrësh pagesën mujore, por është pak më e vështirë të hapësh biznes sepse mundet të përthithen energji dhe mundet të humbasësh.  Kjo i tremb një grup njerëzish dhe ata përsëri nuk guxojnë dhe ka një kuptim edhe frika. 

Për të patur nismën, duhen ide, por para se të kesh ide duhet të kesh strukturën se ku qëndrojnë këto ide. Struktura që duhet të përthithë ose gjenerojë ide të reja nuk është e re, ajo tashmë është një program dhe kualifikim i konceptuar nga institucione akademike që punojnë në këto fusha. 

"Udha e shkronjave" është një Shkollë Ndërkombëtare e Kembrixhit dhe punon me programet dhe kualifikimet e Cambridge Assessment International Education, departament i Universitetit të Kembrixhit. Ne kemi numrin më të madh të regjistrimeve për certifikimet IGCSE dhe A Level nga Shqipëria. 

Mendojmë se tre janë programet e Kembrixhit që janë me shumë interes: programi/kualifikimi "Ndërmarrje" (Enterprise),  programi/kualifikimi "Kontabilitet" (Accounting) dhe programi/kualifikimi "Ekonomiks" që një person duhet t'i ketë në nivel IGCSE ose në nivel A Level. Një kualifikim i Kembrixhit është një cilësi në përmbajtje dhe nuk është thjesht një letër, apo karton që jepet, ndaj të gjithë ata që i kanë realizuar këto certifikime dhe kanë kryer një kurs të plotë kanë mbetur shumë të kënaqur, janë krenarë për kursin të cilit i janë nënshtruar dhe për vlerën e tij reale në jetë dhe në studime të mëtejshme.  

Ne këshillojmë të gjithë të rinjtë që të zgjedhin kurset e shkollës "Udha e shkronjave" për "Ndërmarrjes" "Ekonomiks" dhe "Kontabilitet", me programe dhe kualifikime të Kembrixhit, pavarësisht orientimit profesional që kanë. Nuk ka rëndësi nëse formimi është farmacist, inxhinier, informaticien, veteriner, agronom. Secili mundet t'i shkojë ndërmend të ketë ndërmarrjen e vet në fushën e vet të specializimit.  Disa e marrin guximin edhe pa njohuri bazë, dhe disa të tjerë nuk kanë guxim as kur kanë shumë aftësi.  Siguria që japin njohuritë dhe aftësitë në "ndërmarrje" dhe në "kontabilitet" ndikojnë fuqishëm që të rritet aftësia sipërmarrëse. 

Kurset tona të para do të zhvillohen gjatë verës dhe provimet/certifikimet e para Cambridge IGCSE ose Cambridge As Level do të jenë në tetor 2020. Sezoni i dytë do të jetë qershor 2021. Gjuha e kursit do të jetë anglisht dhe shqip (shpjegime anglisht + shqip, materiale vetëm anglisht dhe provimet vetëm anglisht). Niveli i gjuhës që kërkohet duhet të jetë të paktën B1 (në hyrje të B2). 

Çfarë do të jetë "antiCovid19" në një program ndërkombëtar siç është "enterprise"? 

Do të jetë pikërisht fokusi i projekteve të ndërmarrjes që do të krijojë nxënësi/studenti/kandidati.

Një nga temat e programit është "Mundësitë e ndërmarrjes, rreziqet e saj, detyrimet ligjore dhe kriteret etike për t’u patur parasysh". Është e qartë se secila prej tyre (mundësitë, rreziqet, detyrimet ligjore dhe kriteret etike) në kushtet e reja ka tipare shtesë dhe të ndryshuara. Supozojmë nëse ndërmarrja zgjedh që, për të respektuar kriterin e distancimit social të veprojë me dy ose tre turne biznesin, sa shumë gjëra ndryshojnë në jetën e punonjësve të saj, si do t'i zgjidhë?

Një temë tjetër e programit është " Tregjet dhe klientët ". Është e qartë se pikërisht tregjet dhe klientët do të ndryshojnë me shpejtësi të madhe për shkak të situatës së krijuar nga Covid19 dhe kjo do të thotë se përmbajtja e programit të kualifikimit do të orientohet nga përshtatja me realitetin. 

Bizneset e ish-nxënësve tanë do të jenë laboratori ynë kryesor, që do të thotë se komunikimi me drejtuesit e bizneseve që ata kanë hapur do t'u sjellë kandidatëve shumë këndvështrime me vlerë në kushtet e Shqipërisë dhe është me shumë vlerë që natyra e këtyre bizneseve është e ndryshme.